اشک گرنے لگے آنکھوں میں گل تر اترا

 اشک گرنے لگے آنکھوں میں گُلِ تر اُترا

پھر مِرے سینۂ احساس میں خنجر اترا

کوئی کوچہ نہ سڑک، گھر نہ محلہ کوئی

چاند کیا دیکھ کے اس شہر کے اندر اترا

دور تک جس کے تعاقب میں گئے تھے ہم بھی

شہ سوار ایسا نہ جانے کہاں جا کر اترا

یک بیک پھیل گئی چاندنی محرابوں میں

نیزۂ شب سے چمکتا ہوا اک سر اترا

شامِ غُربت! تِرے گُلنار دریچے کا خیال

بن کے اک پھُول مِری شاخِ غزل پر اترا

خُوں میں ڈُوبے نظر آئے ہمیں چہرے کتنے

سر سے جیسے ہی تِری یاد کا پتھر اترا

بُجھ گئے جب سے اُجالوں کے جزیرے راہی

پھر نہ آنکھوں میں وہ اشکوں کا سمندر اترا

ایم کوٹھیاوی راہی