دِیوانے باغباں کے بنائے ہُوئے ہیں لوگ
دھوکا بھری بہار کا کھائے ہوئے ہیں لوگ
مِلتی نہیں کہیں بھی متاعِ خلوص اب
کس چیز کی تلاش میں آئے ہوئے ہیں لوگ
کل رات ایک خواب نے چونکا دیا مجھے
ایسے لگا کہ خُوں میں نہائے ہوئے ہیں لوگ
آنکھیں دِکھا رہی ہے انہیں زندگی، مگر
جِینے کی پھر سے آس لگائے ہوئے ہیں لوگ
کیسی اُمنگ، کس کی تمنّا، کہاں کا عشق؟
حالاتِ زندگی کے ستائے ہوئے ہیں لوگ
کیا قہر ہے کہ شعلے🔥 اُگلتا ہے ہر کوئی
نفرت سی شے کو دل میں جمائے ہوئے ہیں لوگ
دھرم پال عاقل
No comments:
Post a Comment