اے رہرو راہ شوق و طلب کیا جان کا کھونا آتا ہے

 اے رہروِ راہِ شوق و طلب کیا جان کا کھونا آتا ہے

مطلوب ہو طالب خُود ہی تِرا قُربان جو ہونا آتا ہے

ہے چارہ گری یا فِتنہ گری کرتے ہو جراحت پھر سے ہری

کیوں زخم رسیدہ دل میں تمہیں نشتر کا چبھونا آتا ہے

اندیشۂ قاتل دل میں نہیں مُشکل میں بھی ہُوں مُشکل میں نہیں

جب تیغ و سِناں کے سائے میں آرام سے سونا آتا ہے

بھولا ہے فقیہِ شہر تو دل والے سے کیا ہو غُسل و وضو

اس کو تو بہانا آتا ہے لہُو اور پاپ کا دھونا آتا ہے

رُک جائے گا سب ہیجانِ جفا مایوس نہ ہو دہقانِ وفا

جب کھیت بنانا آتا ہے،۔ جب بِیج کا بونا آتا ہے

عارف ندوی

چودھری معین الدین عثمانی