اس طرح کیجئے اندیشہ فردا سے گریز

اس طرح کیجیے اندیشۂ فردا سے گریز
مصلحت کرتی ہے جس طرح شناسا سے گریز
تشنگی میری طرح تُو بھی قلندر نکلی
کبھی قطرے پہ تصدق کبھی دریا سے گریز
منزلِ عشق کا راہی ہوں مجھے کیا معلوم
دامنِ صبر ہے بہتر کہ تمنا سے گریز
اور جینے کا ہنر اس کے سوا کچھ بھی نہیں
صرف خوشیوں سے تعلق غمِ دنیا سے گریز
آخرش ڈھونڈھ لیا درد کا درماں ہم نے
چارہ سازوں سے کنارہ، دمِ عیسیٰ سے گریز
اور بن جائیے استادِ سخن، کعبۂ فن
لیجیے میرؔ سے تشبیب تو مرزاؔ سے گریز
کون کہلائے گا پھر قیس کا سجادہ نشیں
جب جلیلؔ آپ بھی کرنے لگے صحرا سے گریز

جلیل نظامی