یہ عمر یہ حسن اور ناز و ادا اس پر یہ سنگھار اللہ اللہ​

یہ عمر، یہ حسن اور ناز و ادا، اس پر یہ سنگھار، اللہ، اللہ​
مستئ نِگہ اف اف کی جگہ، سینے کا ابھار، اللہ، اللہ​
یہ گیسوۓ پیچاں دامِ خِرد، یہ نرگسِ فتاں دشمنِ دِیں​
یہ عارضِ رنگیں غیرتِ گل ہستی کی بہار، اللہ، اللہ​
گالوں میں تِرے کندن کی دمک بالوں میں تِرے عنبر کی مہک​
سینے پہ جواہر کی یہ چمک، اور اس پہ یہ ہار، اللہ، اللہ​
بکھری ہوئی زلفیں دامِ بلا، یہ جنبشِ مژگاں تیرِ قضا​
تقویٰ کی عدو یہ لغزشِ پا، یہ رنگِ خمار، اللہ، اللہ​
خود خامۂ قدرت نازاں ہے ہر چشم تماشا حیراں ہے​
اس صفحۂ عنصرِ خاکی پر یہ نقش و نگار، اللہ، اللہ
اسلام میں اکبرؔ کو یہ غلو یہ رنگ و رع یہ زہد کی بُو​
اور اس بتِ کافر کا ان کو یہ عشق یہ پیار، اللہ، اللہ​

اکبر الہ آبادی