آج یوں موج در موج غم تھم گیا

آج یوں موج در موج غم تھم گیا، اس طرح غم زدوں کو قرار آ گیا​

جیسے خوشبوئے زلفِ بہار آ گئی، جیسے پیغامِ دِیدارِ یار آ گیا​

جس کی دِید و طلب وہم سمجھے تھے ہم، رُو بُرو پھر سرِ رہگزار آ گیا​

صبحِ فردا کو پھر دل ترسنے لگا، عمرِ رفتہ تِرا اعتبار آ گیا​

رُت بدلنے لگی رنگِ دل دیکھنا، رنگِ گلشن سے اب حال کھلتا نہیں​

زخم چھلکا کوئی یا کوئی گُل کِھلا، اشک اُمڈے کہ ابرِ بہار آ گیا​

خونِ عُشاق سے جام بھرنے لگے، دل سُلگنے لگے، داغ جلنے لگے​

محفلِ درد پھر رنگ پر آ گئی، پھر شبِ آرزُو پر نکھار آ گیا​

سر فروشی کے انداز بدلے گئے، دعوتِ قتل پر مقتلِ شہر میں​

ڈال کر کوئی گردن میں طوق آ گیا، لاد کر کوئی کاندھے پہ دار آ گیا​

فیضؔ کیا جانیے یار کس آس پر، منتظر ہیں کہ لائے گا کوئی خبر​

مئے کشوں پر ہُوا محتسب مہرباں، دلفگاروں پہ قاتل کو پیار آ گیا​

فیض احمد فیض