رنگ لايا ہے ہجوم ساغر و پيمانہ آج

رنگ لايا ہے ہجومِ ساغر و پيمانہ آج

بھر گئی سيرابيوں سے محفلِ رندانہ آج

بسکہ زيب انجمن ہے وہ جلوۂ جانانہ آج

ہے سراپا آرزو ہر عاشق ديوانہ آج

يہ ہوا بے تابيوں پر نشۂ مے کا اثر

کہہ ديا سب ان سے حالِ شوقِ گستاخانہ آج

رشک سے مٹ مٹ گئے ہم تشنہ کامانِ وصال

جب ملا لب ہائے ساقی سے لبِ پيمانہ آج

ہے فروغِ بزمِ يکتائی جو وہ شمع جمالی

آ گئی ہے دل ميں بھی بے تابئ پروانہ آج

ہيں سرورِ وصل سے لبريز مشتاقوں کے دل

کر رہی ہيں آرزوئيں سجدۂ شکرانہ آج

حسرتيں دل کی ہوئی جاتی ہيں پامالِ نشاط

ہے جو وہ جانِ تمنا، رونقِ کاشانہ آج

غرق ہے رنگنيوں ميں مستيوں سے چور چور

ہےسراپا بے خودی وہ نرگسِ مستانہ آج

میہمانِ خانۂ دل ہے جو وہ رشکِ بہار

ہو گيا ہے غيرتِ فردوس يہ ويرانہ آج

مل گيا اچھا سہارا عذرِ مستی کا ہميں

لے ليا آغوش ميں اس گل کو بے باکانہ آج

خم لگا دے ہم بلانوشوں کے منہ سے ساقيا

کام آئے گا نہ ساغر آج، نے  پيمانہ آج

ديکھئے اب رنگ کيا لائے وہ حسن دلفريب

آئينہ پيش نظر ہے ہاتھ ميں ہے شانہ آج

ميں ہی اے حسرتؔ نہيں محوِ جمالِ روئے يار

پڑ رہی ہيں سب نگاہيں اس پہ مشتاقانہ آج​

حسرت موہانی