دل لے کے ہر بشر کا ستمگر نہ چال کر

دل لے کے ہر بشر کا ستمگر نہ چال کر

کھوٹے کھرے سبھی ہیں ذرا دیکھ بھال کر

ساقی عبث عبث ہے تجھے محتسب کا ڈر

تھوڑی سی دے بھی دے مجھے چپکے سے ڈال کر

جب حرص ابھارتی ہے تو کہتی ہے مجھ سے عار

مر جا مگر کسی سے نہ ہر گز سوال کر

اب خط میں شوقِ دید کہاں تک رقم کروں

لے جا تُو نامہ بر مری آنکھیں نکال کر

شادی سے غم کی قدر سوا چاہیے حفیظؔ

تھوڑی سی ہو خوشی تو بہت سا ملال کر

حفیظ جونپوری