حریم دل میں بھی تو ہے سر بازار بھی تو ہے

حریم دل میں بھی تُو ہے سر بازار بھی تُو ہے

کبھی بندہ کبھی مولیٰ کبھی دلدار بھی تُو ہے

تِرے ہی ذات میں گم ہے مِرے سجدوں کی عظمت بھی

تِری سرکار کا میں ہوں، مِری سرکار بھی تُو ہے

تجھے سوچوں تجھے دیکھوں تجھے پوجوں تجھے ڈھونڈوں

مِرا مرشد بھی اب تُو ہے، مِرا اب یار بھی تُو ہے

مِری دیوانگی کو اب سمجھنا ہے بہت مشکل

جنونِ شوق بھی تُو ہے، خرد آثار بھی تُو ہے

ڈبو دے یا مجھے تُو پار پہنچا دے تِری مرضی

سمندر میں بھی تُو ہے اور سمندر پار بھی تُو ہے

ضیاؔ رگ رگ سے سنتا ہے یہی آواز اے جاناں

نظر قلب و جگر دھڑکن زباں گفتار بھی تُو ہے

ضیا علوی