کیا جرم کیا ہے جو اندھیرے میں پڑا ہے

کیا جرم کِیا ہے جو اندھیرے میں پڑا ہے

کہتے ہیں کوئی دِیپ ہواؤں سے لڑا ہے

کچھ لوگوں سے جب میری ملاقات نہیں تھی

میں بھی یہ سمجھتا تھا خدا سب سے بڑا ہے

پنچھی تِری پرواز ہے کچھ روز سے بوجھل

کیا تیرے پروں میں کوئی موتی بھی جڑا ہے

اے شیخ! نہ بن جائے کہیں بوجھ یہ تجھ پر

جو تیرا عصا ہے وہ تِرے قد سے بڑا ہے

ہوتا رہا شاہوں کا حنوط اس لیے اب تک

فرعون کا لاشہ نہ گَلا ہے نہ سڑا ہے

بن سکتا نہیں چاند کسی کا بھی کھلونا

بچہ مِرے اندر کا مگر ضد پہ اڑا ہے

جذبات ہیں سچے تِرے اے سوہنی، لیکن

کچا تِرے گجرات کی مٹی کا گھڑا ہے

خود موت چراتی ہے قتیلؔ اس سے نگاہیں

دیوانہ تو کب سے درِ قاقل پہ کھڑا ہے

قتیل شفائی