مبتلا بس کہ ہوں میں اس بت ہرجائی کا

مبتلا بس کہ ہوں میں اس بتِ ہرجائی کا

جابجا کیوں نہ ہوں شہرہ مِری رسوائی کا

دید سو طرح کے عالم کہ ہمیں تھی جس جا

عالم آتا ہے نظر اب وہیں تنہائی کا

تک کے ہر ایک کی صورت کو وہ رو دیتا ہے

ان دنوں میں ہے یہ نقشا تِرے سودائی کا

دل پر داغ کا یہ دشتِ محبت میں ہے رنگ

پھول آوارہ ہوں جوں لالۂ صحرائی کا

جوشِ وحشت کو مِرے سن کے تماشا ہے اگر

دیکھنے آئے تماشا وہ تماشائی کا

دور دور اتنا نہ پھر اس سے کہ پہنچا ہے میاں

حال مرنے کے قریب اب تِرے شیدائی کا

کاش یوسفؑ کی میں اس کو نہ دکھاتا تصویر

اب ہوا اور بھی دعویٰ اسے یکتائی کا

جرأتؔ اس میں غزل اک اور بھی پُر درد سی کہہ

شوق ہے تجھ کو اگر معرکہ آرائی کا

قلندر بخش جرأت