سر تن سے میرے تو نے ستمگار اتارا

سر تن سے میرے تُو نے ستمگار اتارا

آخر کو محبت میں مجھے پار اتارا

رک کر مِری فریاد سے ہمسائے یہ بولے

کس شخص نے یاں لا کے یہ بیمار اتارا

سر کٹنے کاقاتل! میں کروں شکر کہاں تک

تُو نے تو یہ تن پر سے بڑا بار اتارا

ہم گھر گئے اس کے تو رہا بام پہ وہ شوخ

نیچے اسے گردوں سے نہ زنہار اتارا

اس شوخ نے کل باتوں ہی باتوں میں فلک پر

سو بار چڑھایا مجھے، سو بار اتارا

دیکھا جسے تُو نے خمِ ابرو کو چڑھا کر

آخر پھر اسے قبر ہی میں یار! اتارا

شب چاند سے مکھڑے پہ جو زلف اس کی بکھر گئی

جو سامنے آیا، بس اسے مار اتارا

ڈوبا ہی تھا میں بحرِ محبت میں، پہ جرأتؔ

اس دیدۂ گریاں نے مجھے پار اتارا

قلندر بخش جرأت