میں شاد تنہا اک طرف دنیا کی دنیا اک طرف

میں شاد تنہا اک طرف، دنیا کی دنیا اک طرف

سارا سمندر ایک طرف، آنسو کا قطرہ اک طرف

اس آفتِ جاں کو کبھی پردہ اٹھانا ہی نہ تھا

اک سمت عیسیٰ دم بخود، غش میں ہیں موسیٰ اک طرف

ساقی بغیر احوال یہ، پہنچا ہے مے خانہ کا اب

جام اک طرف ہے سرنگوں، خالی ہے مِینا اک طرف

یا رب مفر اس حسن سے دل کو کسی جانب نہیں

تِرچھی نگاہیں ایک سو، زلف چلیپا اک طرف

'وہ تیغ ٹیکے کہتے ہیں 'دیکھوں تو حق پر کون ہے

میں اک طرف شادؔ اک طرف سارا زمانہ اک طرف

شاد عظیم آبادی