جو لوگ ایک غم اپنا سنانے آتے ہیں

جو لوگ ایک غم اپنا سنانے آتے ہیں

وہ چار غم تِری محفل سے لے کے جاتے ہیں

ہر آدمی سے محبت کی سرگزشت نہ پوچھ

سنائے جانے کے قصے سنائے جاتے ہیں

بَری ہیں پُرسشِ اعمال سے جو دیوانے

تِری نہیں میں نہیں، ہاں میں ہاں ملاتے ہیں

مجھے وہ عیش میں بھُولے تو کیا مجال مِری

خوشی میں لوگ خدا کو بھی بھُول جاتے ہیں

نہیں نصیب ملاقاتِ ظاہری کے مزے

خیال میں تو وہ ہر وقت آتے جاتے ہیں

کبھی ندیم، کبھی چارہ گر، کبھی معشوق

وہ روز ایک نیا روپ لے کے آتے ہیں

صفیؔ ہماری جگہ کیا ہو ان کی محفل میں

ہزار آتے ہیں ایسے، ہزار جاتے ہیں

صفی اورنگ آبادی