کچھ تو احوال غم دل بھی سنایا ہوتا

کچھ تو احوالِ غمِ دل بھی سنایا ہوتا

رک گیا تھا تو اسے اور بھی روکا ہوتا

شام اتری ہے سرِ عرصۂ صحرائے خیال

منظرِ دل سے کوئی چاند بھی ابھرا ہوتا

کسی پتے سے ہی ملتا کوئی عنوانِ بہار

پھول کوئی تو سرِ شاخ بھی مہکا ہوتا

جس کی گلیوں میں ہوا بن کے پھرے ہیں برسوں

کوئی اس شہر سے اپنا بھی علاقہ ہوتا

وہ ملا تھا سرِ راہے پہ بہت لوگ تھے ساتھ

آج کی شام تو وہ شخص اکیلا ہوتا

لے اڑی تجھ کو کہاں منزلِ جاناں کی ہوا

ناسمجھ! راہ میں کچھ اور بھی کھویا ہوتا

شام ٹھہری ہوئی ہوتی، لبِ جُو تُو ہوتا

عکس پانی میں تِرے رخ کا لرزتا ہوتا

اسلم انصاری