یہ چند سانسیں جو دی ہیں تو اختیار بھی دے

یہ چند سانسیں جو دی ہیں تو اختیار بھی دے 

کہ میرے ہونے کا اب مجھ کو اعتبار بھی دے

تھکن بلا کی سفر سے ہے، جسم ٹوٹتا ہے 

شکستہ ناؤ، کسی گھاٹ اب اتار بھی دے

فلک کو پوری خوشی کب کسی کی بھاتی ہے 

گلوں کو رنگ بھی، خوشبو بھی دے تو خار بھی دے

کھِلائے پھول کچھ ایسے کہ کھِل اٹھے چہرہ 

 پہ رُت ہے ایسی جو اندر سے مجھ کو مار بھی دے

 تیرے ہی بس میں ہے خلّاق پالنے والے

دلوں کو چَین بھی دے صبر بھی قرار بھی دے

ناصر علی سید