تیرے منصوبے ترے شر ترے ادراک پہ خاک

تیرے منصوبے تِرے شر تِرے ادراک پہ خاک

فتنہ گر! ہر تِری تدبیرِ خطرناک پہ خاک

غالب و میر پہ تنقید کی کوشش ہے عبث 

کیا یہ ممکن ہے کوئی ڈال دے افلاک پہ خاک

آدمی ہے تو فرشتوں کی طرح بات نہ کر

خودپسندی میں نہ پڑ جائے تِری خاک پہ خاک

آپ رکھتے ہی نہیں حفظِ مراتب کا خیال

گر یہ بے باکی ہے اس جذبۂ بے باک پہ خاک

چند لمحوں کے تِرے قرب نے برباد کیا

جو تِرے ساتھ ہوئی تھی کبھی اس واک پہ خاک

خود نمائی ہی اگر ہے فقط اس کا مصرف

تو مِرے یار تِری قیمتی پوشاک پہ خاک

جو مگر مچھ کی طرح اشک بہائے مہتاؔب

رات دن ڈالئے اس دیدۂ نمناک پہ خاک

مہتاب قدر