یاد اس کی اب تو رونق جاں بھی نہیں رہی

قندیلِ عشقِ نور فشاں بھی نہیں رہی

یاد اس کی اب تو رونقِ جاں بھی نہیں رہی

صحرا بس ایک قطرے میں غرقاب ہو گئے

اب آرزوئے تشنہ لباں بھی نہیں رہی

اب لوٹنا پڑے گا انا کے محاذ سے

اب طاقتِ گرفتِ کماں بھی نہیں رہی

ہے خضر کو بھی راہ دکھانے سے اجتناب

اور آسماں پہ کاہکشاں بھی نہیں رہی

پہلے بھی دل غریب تھا لیکن نہ اس قدر

اب تو متاعِ وہم و گماں بھی نہیں رہی

خاموشیوں کا زہر کچھ اتنا شدید تھا

اس شہر میں صدائے سگاں بھی نہیں رہی

خاور دیارِغیر لگے اپنا ہی وطن

عزت ہماری اب تو یہاں بھی نہیں رہی

خاور زیدی