کہکشاں وقت کی پلکوں پہ اتر آئی ہے

کہکشاں وقت کی پلکوں پہ اتر آئی ہے ​

آسماں تک مِری آہوں کی پذیرائی ہے​

کیا تجلی ہے کہ ہر آنکھ میں در آئی ہے​

کیا تماشا ہے کہ ہر شخص تماشائی ہے​

بارہا سلسلہ کفارۂ جاں تک پہنچا​

بارہا تجھ سے نہ ملنے کی قسم کھائی ہے​

آئینہ بن گیا جس شخص نے دیکھا تجھ کو​

آئینہ ساز! تِرا حسنِ خود آرائی ہے​

میں نے دیکھا ہے بکھرتے ہوئے شیرازۂ گل​

میری نظروں میں مآلِ چمن آرائی ہے​

نہ کوئی دیکھنے والا نہ سجانے والا​

زخمِ دل آئینۂ لالۂ صحرائی ہے​

پھر مِرے چاکِ گریباں کی نمائش ہو گی​

پھر خرد کو ہوسِ انجمن آرائی ہے​

اب کوئی شعلۂ آواز اٹھے یا نہ اٹھے​

آرزو بامِ سماعت سے اتر آئی ہے​

دلِ پُر داغ بھی اک طرفہ تماشا ہے ایاز​

بزم کی بزم ہے تنہائی کی تنہائی ہے​

​

ایاز صدیقی ​