رنگ سے پیرہن سادہ حنائی ہو جائے

رنگ سے پیرہنِ سادہ حنائی ہو جائے 

پہنے زنجیر جو چاندی کی طلائی ہو جائے 

خود فروشی کو جو تُو نکلے بہ شکل یوسف 

اے صنم! تیری خریدار خدائی ہو جائے 

خطِ توام کی طرح عاشق و معشوق ہیں ایک 

دونوں بے کار ہیں، جس وقت جدائی ہو جائے 

تنگی گوشۂ عزلت ہے بیاں سے باہر 

نہیں امکان کہ چیونٹی کی سمائی ہو جائے

یہی ہر عضو سے آتی ہے صدا فرقت میں 

وقت یہ وہ ہے جدا بھائی سے بھائی ہو جائے

اپنی ہی آگ میں اے برق جلا جاتا ہوں 

عنصرِ خاک ہو تربت جو لڑائی ہو جائے

مرزا رضا برق