بنا مطلب کی دنیا میں کوئی کب دل سے ملتا ہے

بِنا مطلب کی دنیا میں کوئی کب دل سے ملتا ہے

جو ہر مشکل کا ساتھی ہو بڑی مشکل سے ملتا ہے

ہزاروں وسوسے لوگوں کے ذہنوں میں ابھرتے ہیں

امیرِ شہر جب جا کر کسی قاتل سے ملتا ہے

کریں بے شک نہ باتیں آپ لیکن بیٹھا رہنے دیں

سکونِ دل ہمیں بس آپ کی محفل سے ملتا ہے

گھروندے ریت کے سب ڈوب جاتے ہیں کناروں پر

سمندر جب بھی ٹکرا کر کسی ساحل سے ملتا ہے

مجھے پاگل بنا رکھا ہے اس کی شوخ نظروں نے

مگر وہ ہے کہ پھر بھی روز ہر عامل سے ملتا ہے

زمین و آسماں اعجاز دونوں ہی لرزتے ہیں

تکبر سے زمانہ جب کسی سائل سے ملتا ہے

اعجاز قریشی