وجہ تسکین جنوں وصل نگاراں بھی نہیں

 وجہِ تسکینِ جنوں وصلِ نگاراں بھی نہیں

عشق آساں ہے مگر اس قدر آساں بھی نہیں

ہر تجلی کے لیے ظرفِ نظر ہے درکار

جلوہ ارزاں ہے مگر اس قدر ارزاں بھی نہیں

جانے کیا سوچ کے ہر راہ میں رک جاتا ہوں

اس سے ملنے کا کسی موڑ پہ امکاں بھی نہیں

ہر نفس کھینچ رہا ہے کوئی رگ رگ سے لہو

اور نشتر کوئی پیوست رگِ جاں بھی نہیں

قافلے ہیں کہ گزرتے ہی چلے جاتے ہیں

منزلیں ہیں کہ کسی سمت نمایاں بھی نہیں

گل کا کیا ذکر کہ اے دوست مرے دامن پر

ایک مدت سے کسی خار کا احساں بھی نہیں

کون سمجھے گا مرے ظرفِ جنوں کی وسعت

میں پریشاں ہوں مرا حال پریشاں بھی نہیں

تو یہ الزام مرے ظرفِ جنوں پر نہ تراش

عشق کافر بھی نہیں عشق مسلماں بھی نہیں

شور اٹھا دوں میں گل و لالہ کے پردے لیکن

یاں کوئی محرمِ اسرارِ گلستاں بھی نہیں

شور علیگ

منظور حسین