ہم کو خیالِ یار کی عادت سی ہو گئی
دل کو بھی انتظار کی عادت سی ہو گئی
دو چار آنسوؤں سے کہاں مل سکا سکوں
آنکھوں کو زار زار کی عادت سی ہو گئی
راہِ حیات میں تھے کھڑے جا بجا ببول
سو ہم کو خارزار کی عادت سی ہو گئی
کچھ اس کو پاس وعدے کا اپنے نہیں رہا
کچھ ہم کو اعتبار کی عادت سی ہو گئی
اک روز اس نے پیار سے دیکھا تھا اور بس
پھر ہم کو اس سے پیار کی عادت سی ہو گئی
ہم نے بھی اب خزاؤں سے رشتہ بنا لیا
اس کو بھی نو بہار کی عادت سی ہو گئی
کانٹے جو اپنے سر کو اٹھانے لگے صدف
پھولوں کے کاروبار کی عادت سی ہو گئی
صبیحہ صدف
No comments:
Post a Comment