چمکنے والا ہے اب آفتابِ مے خانہ
چلے گا پھر وہی دورِ شرابِ مے خانہ
یہ بے سبب نہیں واعظ کا میکدے میں نزول
یہ پڑھنے آیا ہے شاید کتابِ مے خانہ
پلائے جا ہمیں کہنہ شراب پیرِ مغاں
شباب پر رہے برسوں شرابِ مے خانہ
نہ سن نہ سن مرے ساقی یونہی قیامت تک
ہلائے جاؤں گا زنجیرِ بابِ مے خانہ
نہ کر سکا کوئی تکمیلِ رسمِ مے نوشی
بہت ہی سخت ہے شاید نصابِ مے خانہ
بہار آ گئی گلشن کے چپے چپے پر
جو آیا پھولوں میں رنگِ شرابِ مے خانہ
نہ حاجتِ مے و مینا رہی مجھے ساغر
کہ چشمِ پیرِ مغاں ہے جوابِ مے خانہ
ساغر اجمیری
No comments:
Post a Comment