لمحہ در لمحہ تری راہ تکا کرتی ہے

 لمحہ در لمحہ تِری راہ تکا کرتی ہے

ایک کھڈکی تِری آمد کی دعا کرتی ہے

ایک صوفہ ہے جسے تیری ضرورت ہے بہت

ایک کرسی ہے جو مایوس رہا کرتی ہے

سلوٹیں چیختی رہتی ہیں مِرے بستر پر

کروٹوں میں ہی مِری رات کٹا کرتی ہے

وقت تھم جاتا ہے اب رات گزرتی ہی نہیں

جانے دیوار گھڑی رات میں کیا کرتی ہے

بھول جاتا ہوں میں اکثر اسے فرج پر رکھ کے

آج کل کافی بھی خود کو ہی پیا کرتی ہے

چاند کھڑکی میں جو آتا تھا، نہیں آتا اب

تیرگی چاروں طرف رقص کیا کرتی ہے

میرے کمرے میں اداسی ہے قیامت کی مگر

ایک تصویر پرانی سی ہنسا کرتی ہے

عباس قمر