تخلیہ درکار ہے حد ادب

تخلیہ درکار ہے، حدِ ادب

آمدِ اشعار ہے، حدِ ادب

آئینہ خانہ ہے ساری کائنات

ہر جگہ ہی یار ہے، حدِ ادب

کون سمجھے گا دِلا تیری زباں

محفلِ اغیار ہے، حدِ ادب

جا رہا ہے صرف لٹنے کیلئے

قافلہ تیار ہے، حدِ ادب

جنس ہر انمول ہوتی ہے یہاں

عشق کا بازار ہے، حدِ ادب

پھر تلاطم ہے فشارِ خون میں

آمدِ دلدار ہے، حدِ ادب

ہم پہ لازم ہے رقیبوں کا لحاظ

یہ بھی حکمِ یارِ ہے، حدِ ادب

خامشی نافذ ہے ان کے شہر میں

بولنا دشوار ہے، حدِ ادب

کیا گراں ہو طبعِ نازک پر امر

حسن کا دربار ہے، حدِ ادب

امر روحانی