دل و نگاہ میں سپنا کوئی سجا تو سہی

 دل و نگاہ میں سپنا کوئی سجا تو سہی

وہ پاس آئے گا اک دن اسے بلا تو سہی

وہ زندگی میں تِرا ساتھ پھر نہ چھوڑے گا

جو بے خبر ہے اسے ہمسفر بنا تو سہی

تِرے خیال کی دنیا مہک اٹھے گی اگر

گلاب دل کے مِرے ہمنوا کھلا تو سہی

بہاریں آ کے تِرے در پہ دستکیں دیں گی

خوشی کی دُھن پہ کوئی گیت گنگنا تو سہی

بناؤں گی تجھے یاقوت دیکھنا پھر میں

تُو اشک بن کے مِری آنکھ میں سما تو سہی

کھلیں گے پھول کی مانند پھر یہ زخم ترے

حرا کی یاد کو تو چارہ گر بنا تو سہی

حرا قاسمی