میں اسم اعظم کا ورد کر کے یہ جن نکالوں تو مارا جاؤں

 میں اسمِ اعظم کا وِرد کر کے یہ جِن نکالوں تو مارا جاؤں

کہ اپنے دل سے اگر محبت کی پِن نکالوں تو مارا جاؤں

مٹاؤں کیسے میں زائچوں سے کہ زندگی جن پہ کٹ رہی ہے

میں جنتری سے وصال رُت کے وہ سِن نکالوں تو مارا جاؤں

شگون اچھا ہے پر پرندہ تمہارے ہاتھوں میں پھنس گیا ہے

ہے فال ایسی کہ اب رہائی کا دن نکالوں تو مارا جاؤں

میں ایک سایہ کہ جی رہا ہوں تمہاری آنکھوں کی روشنی میں

سو ایک لمحہ بھی ان چراغوں کے بِن نکالوں تو مارا جاؤں

تکان بن کے مِرے تنفس کے تار میں تم رچے ہوئے ہو

کہ بس سہولت کے اس سفر سے کٹھن نکالوں تو مارا جاؤں

عاطف جاوید عاطف