ذکرِ امیرِ شہر ہو افیون کے بغیر
گویا کسی کو نیک کہیں نون کے بغیر
میں اپنا اک جہان بنانے کی دُھن میں ہوں
لیکن یہ حرفِ کُن ہے فیکُون کے بغیر
ہائے وہ خوش نصیب زمانہ کہ جب یہاں
جمہوریت کا ذکر ہو شبخون کے بغیر
لوگو! کسی خدا کے ولی سے یہ پوچھنا
اہلِ نماز کون ہیں؟ ماعون کے بغیر
موسیٰ کی لُکنتوں سے کبھی یہ سوال ہو
کیا سامری کا رنگ تھا ہارون کے بغیر
ان سے تپانِ عشق کی لذت نہ پوچھیۓ
چونسہ ملا ہے جن کو تپِ جون کے بغیر
دنیا! خیال کر کہ غزل کا یہ ذائقہ
شاید ملے نہ عرفئ مجنون کے بغیر
عرفان عرفی
No comments:
Post a Comment