جگنو مِرے نصیب کے لا کر اُجال دے
غم کی سیاہ رات کو اب تو زوال دے
رو رو کے بھر گئی ہے غموں سے یہ زندگی
دکھ سے بچا لے اور مِری خوشیاں اُچھال دے
گرد و غبار آندھی و طوفاں میں ہیں گھرے
کنکر گرے ہیں آنکھ میں ان کو نکال دے
بھر مانگ میں مِری وہ ستاروں سے روشنی
ایسی کہ جس کی آ کے زمانہ مثال دے
پائے تخیلات ہوں رقصاں زمین پر
دیپک بنا کے لفظ پھر ان کو دھمال دے
گلشن کے ہر گلاب کی خوشبو سنبھال رکھ
دامن میں گلستان کے مہکا جمال دے
ثمینہ گل
No comments:
Post a Comment