کیا عجب غم سے اگر تیرے عزادار گرے

 کیا عجب غم سے اگر تیرے عزادار گِرے

ہم تو مانیں گے اگر یارِ طرحدار گرے

پھر بھی آتا نہیں بھولے سے خریدار کوئی

مدتیں بیت گئیں قیمتِ بازار گرے

آپ کا گرنا نئی بات نہیں مدح نویس

آپ سے پہلے بھی یاں سینکڑوں فنکار گرے

کیسے ممکن ہے وہاں لشکری فاتح ٹھہریں

پہلے حملے میں جہاں قافلہ سالار گرے

اک ہی جلوے میں ہوئی قوتِ برداشت بھسم

اک تجلی سے ہی سب طالبِ دیدار گرے

یہی بہتر ہے تصورجی کہ اب لوٹ چلیں

اس سے پہلے کہ مِری جان یہ دستار گرے

تصور سمیع