جمال یار دکھاؤ بہت اندھیرا ہے

 جمالِ یار دکھاؤ بہت اندھیرا ہے

نہیں تو حشر اُٹھاؤ بہت اندھیرا ہے

یہ خوف ہے کہ نہ گمراہ کر دے منزل سے

جنوں کا سُورج اُگاؤ بہت اندھیرا ہے

بُجھا بُجھا ہے چراغِ تبسم ان کا جب

پھر اپنا زخم جلاؤ بہت اندھیرا ہے

اُبل پڑیں گے اُجالے تمہاری فکروں سے

قلم سے نُور بہاؤ بہت اندھیرا ہے

جو روشنی کے پیمبر تھے وہ کہاں گُم ہیں

انہیں صدا دو بُلاؤ بہت اندھیرا ہے

گُھٹن اندھیروں سے ہونے لگی سلیم بہت

غزل کے دِیپ جلاؤ بہت اندھیرا ہے

سلیم رضا