کہیں عیسیٰ کہیں دجال کے آنے کی خبر
یعنی دیتا ہی نہیں کوئی ٹھکانے کی خبر
میں ہری شاخ میں آدم کی بقا دیکھتا ہوں
تم سناتے ہو فقط حشر اٹھانے کی خبر
کاسۂ گوش میں اب ڈال، تِری عمر دراز
دل کے آنگن میں کوئی پھول کھلانے کی خبر
ملک الموت! بتا، کون ہے بد خواہ مِرا؟
کون دیتا ہے تجھے میرے ٹھکانے کی خبر
قحط دیتا ہے در و بام پہ دستک عُرفی
اور ایسے میں کھڑی فصل جلانے کی خبر
عرفان عرفی
No comments:
Post a Comment