جاگنے پر خواب کے کھونے کا دُکھ
رو پڑوں میں ہے نا یہ رونے کا دکھ
سونیا اور شاہ زادے کی خوشی
کون سمجھے ساتویں بونے کا دکھ
رت جگے کا اضطراب اپنی جگہ
اور اُس کے رات بھر سونے کا دکھ
ان حسیں پیروں کے بوسے کی خوشی
اور اپنے راستہ ہونے کا دکھ
ہم نے دیواروں کی خوشیاں بانٹ لیں
اور دیکھا ہی نہیں کونے کا دکھ
اس کا بوسہ گال پر سے مِٹ گیا
صبح اٹھ کر ہاتھ منہ دھونے کا دکھ
وہ خوشی جو اور کوئی چھین لے
اپنے کاندھے پر اسے ڈھونے کا دکھ
اور بھی دکھ ہیں زمانے میں مگر
لائنوں میں آخری ہونے کا دکھ
اختر منیر
No comments:
Post a Comment