آج پھر مجھ سے
آج پھر مجھ سے
مِرا کمرہ مخاطب ہے
دراڑیں وہ کبھی
چھت کی دکھاتا ہے
کبھی دیوار میں پڑتے شگافوں کو
نشاں جھلسے ہوئے رنگوں کا مجھ کو
مبتلا کر دیتا ہے ہیبت میں
مکڑی کے سبک جالے
ہوا کے دوش پر لہرانے لگتے ہیں
زوال زندگی کا وہ پتہ بھی دینے لگتے ہیں
زمیں کمرے کی
بوسیدہ کہانی جب سناتی ہے
کواڑوں سے صدا اٹھتی ہے
رونے اور سسکنے کی
کبھی آہیں سی بھرنے کی
انہیں لمحوں کے سائے میں مگر
کچھ جھانکتی انگور کی بیلیں
دریچے سے تبسم کا شگفتہ عکس
دکھلاتی ہیں آنکھوں کو
جعفر ساہنی
No comments:
Post a Comment