دل مضطر کو چین آنے سے پہلے

 دلِ مضطر کو چین آنے سے پہلے

بہت تڑپا تمہیں پانے سے پہلے

فقط وصلت کی لذت سے تھا واقف

تِری فُرقت کا غم کھانے سے پہلے

لگاؤ دل بھی تو ہے دھیان لازم

حذر بہتر ہے پچھتانے سے پہلے

جیا کرتے تھے اپنی زندگی ہم

کسی کے نام ٹھہرانے سے پہلے

سنو، اب دھیان اپنا خود ہی رکھنا

اسے کہنا پڑا، جانے سے پہلے

طبیعت میں توازن اب ہے، ورنہ

تھے ہم پگلے سے، دیوانے سے، پہلے

پرکھتا ہے کبھی غم دے کے عاطف

خدا تقدیر چمکانے سے پہلے

عاطف ملک

عین میم