اے حسنِ بے مثال! تِرے خال و خد کی خیر
اے صاحب جمال! تِرے خال و خد کی خیر
دیکھیں گے اک نظر تجھے اور لوٹ جائیں گے
ہم کو نہ کل پہ ٹال، تِرے خال و خد کی خیر
ہر روز مانگتے ہیں تِرے واسطے دعا
تجھ پر نہ ہو زوال، تِرے خال و خد کی خیر
مجھ بے ہُنر فقیر کو تیرے سبب سے ہی
حاصل ہوا کمال، تِرے خال و خد کی خیر
ایسا نہ ہو سنبھل نہ سکیں اس چمک سے ہم
مشکل میں اب نہ ڈال، تِرے خال و خد کی خیر
منصور فائز
No comments:
Post a Comment