تم بھی کن رس نہیں تھے

 تم بھی کن رس نہیں تھے

یاد ہے ایک دوست نے بتایا تھا

کہ وادی سُر لگانے سے

راگنی باطل ہو جاتی ہے

راگنی کے باطل ہونے کا تصور

مجھے بہت ناگوار گزرا تھا

میں بھی ان دنوں

ایک راگنی کے حصار میں تھی

جس میں لگنے والے

سارے سُر کومل تھے

یہ سُر دائیں جانب لہراتے

تو چاروں شانے چِت

دائیں جانب گِر جاتی

بائیں طرف ڈولتے تو

دل پسلیوں سے اُچھل کر

مٹی میں جا رُلتا

نیچے سرکتے تو میں

پاتال میں جا گِرتی

اوپر اُٹھتے تو

آسمان کی جانب اُڑنے لگتی

تب ہی پتہ چلا کہ

لہروں کی سنگت میں

زندگی گزارنا کتنا مشکل ہے

تم بھی کن رس نہیں تھے

میں نے چُپکے سے

راگنی میں وادی سُر لگا دیا

تاکہ جی سکوں

پاؤں زمیں پر ٹکا کر

پروین طاہر