رہے گا عشق تِرا خاک میں ملا کے مجھے
کہ ابتدا میں ہوئے رنج انتہا کے مجھے
دیئے ہیں ہجر میں دکھ درد کس بلا کے مجھے
شبِ فراق نے مارا لٹا لٹا کے مجھے
بغیر موت کے کس طرح کوئی مرتا ہے
یقیں نہ آئے تو وہ دیکھ جائیں آ کے مجھے
بلائے عشق تو دشمن کو بھی نصیب نہ ہو
مِرا رقیب بھی رویا گلے لگا کے مجھے
کہا یہ دل نے؛ چلو آج کوئے قاتل میں
اجل کہاں سے کہاں لے گئی لگا کے مجھے
ہر ایک شخص کو حاصل جدا ہے کیفیت
جفا کے لطف تجھے ہیں، مزے وفا کے مجھے
غضب ہے آہ میری داغ! نام ہے میرا
تمام شہر جلاؤ گے کیا جلا کے مجھے
داغ دہلوی
No comments:
Post a Comment