رقص
کہانی ختم ہوتی ہے
کہانی ختم ہوتے ہی کہانی ختم بس سمجھو
زمیں اک فرشِ مقتل ہے
جہاں زادوں کو ہر صورت
یہاں پر رقص کرنا ہے
تماشا سج چکا کب کا
تماشا بیں، نظر کی پُتلیاں مٹکا رہے ہیں
وہ سب حیرت کو حسرت میں
بدلتا دیکھنے کے منتظر ہیں
بدن کوڑا برسنے سے اُدھڑ کر
پھول بن جائے تو خوشبو رقص کرتی
ہر طرف محسوس ہوتی ہے
بڑھے گا شور اب رقاص کی اندام و حرکت پر
بدن جھومے گا تو
آنکھیں طرب سے پھیل جائیں گی
ادائیں، عُشوہ ہائے دلبری غمزوں کی پُرکاری
لہو میں جھلملاتی مُشتعل خواہش کی انگیاری
کہ رادھا رقص کرتی ہے
مگر سہمی تھکی ہاری
ادھر چشم ہوس پر رقص کرتی ساحرہ کا
وار کاری ہے
لچکتا جسم جب جب بے خودی میں تھرتھراتا ہے
تماشا بین کا ضبط و اجارہ ٹوٹ جاتا ہے
بہر سو داد کی تکثیر جس دم پھیل جاتی ہے
تھکی ہاری لرزتی لعبتِ جاں تھرتھراتی ہے
زمیں پر بِسمل بے کل لرزتا، ڈھیر زخموں کا
لہو تازہ زمیں پر اور ہوا میں باس پھولوں کی
تماشائی، تماشا، فرش مقتل منتظر ہیں کہ
نیا گلزار نو رستا بدن بسمل کا حاضر ہو
کھلونے لعبتیں عشرت کدے دائم رہیں آباد
کہانی ختم ہو گی اور آ جائے گی دنیا زاد
زمیں پھولوں کی فصلیں کیا اسی کارن اُگاتی ہے
کہ مالن ڈالیاں لے کر در مقتل پہ دھر آئے
انور زاہد
No comments:
Post a Comment