مرا دَمساز عیاری نہیں کرتا
محبت کی اداکاری نہیں کرتا
ہر اک پر کھول دیتے ہو درونِ دل
یہاں ہر شخص غمخواری نہیں کرتا
بچھڑنے پر تِرے ماتم کناں ہیں ہم
مگر تُو ہے عزاداری نہیں کرتا
وبا پھر کیوں نہ پھیلے اس خرابے میں
بنی آدم شجر کاری نہیں کرتا
مِرا نعم البدل کوئی نہیں لیکن
کوئی میری خریداری نہیں کرتا
مِرا خالق مِرے سجدوں کے لائق ہے
میں باطل کی پرستاری نہیں کرتا
تِرا ہی نام لیوا ہے تِرا ابہام
یہ چرچا غیر کا ناری نہیں کرتا
ابرار ابہام
No comments:
Post a Comment