جنموں کی دوری پر
ہم ایک دوسرے کے
زمانوں سے دُور جنم لیتے رہے
جب ہم ملے
تو وہ ایک لمحے کا
ہزارواں حصہ تھا
اور لمحے کے اس ہزارویں حصے میں
میری روح
اس کے وجود میں
قید ہو چکی تھی
اور میرے وجود میں
اس کی روح
سکونت اختیار کر چکی تھی
جنموں کے تفاوت میں
ہم ایک دوسرے کو
زمانوں کی دوری سے دیکھتے ہیں
مل نہیں سکتے
وہ میرے زمانے سے پہلے چلا آیا
اور میں اس کے زمانے کے بعد
اب ہم اپنے اپنے زمانے میں
نہ ملنے کے ملال سے چُور
کسی اور جنم کا انتظار کرتے رہیں گے
قرۃ العین شعیب
No comments:
Post a Comment