اپنے چہرے پہ ہی چہرہ نیا بنواؤں گا
جیسا تُو چاہے گا ویسا ہی نظر آؤں گا
میں شجر ہوں تیرے ہونے سے ہی سرسبز ہوں میں
تجھ سے بچھڑوں گا تو اک دن میں اُجڑ جاؤں گا
روزِ محشر مجھے خالق نے اگر مہلت دی
اِک غزل تجھ پہ تقی میر سے لکھواؤں گا
دھڑکنیں دل کی تیرے نام سے منسوب ہیں اب
تجھ سے چاہت کو جو روکوں گا تو مر جاؤں گا
مصر والے بھلے دُشمن مجھے سمجھیں اپنا
میں زلیخا کی حمایت میں ہی چِلّاؤں گا
تُو قدم ساتھ بڑھا میرے بہاؤ کی طرف
انتہاء پر میں سمندر ہی نظر آؤں گا
شمس رہتا ہے نمازوں میں بھی اُس کا ہی خیال
جانے کیا رب سے میں سجدوں کی جزا پاؤں گا
شمس بلتستانی
No comments:
Post a Comment