رہی جبیں نہ رہا سنگِ آستاں باقی
جنوں کی آگ بُجھی رہ گیا دُھواں باقی
میں کس کو حالِ پریشاں سناؤں کون سنے
کہاں ہے شہر میں اب کوئی ہمزباں باقی
یہ ساعتیں ہیں غنیمت گزار لیں ہمراہ
نہ پھر زمین نہ ہو گا یہ آسماں باقی
نقوشِ دشت کی مانند مِٹ گئے لیکن
ہماری یاد رہی زیبِ داستاں باقی
اسی امید میں سُلجھا رہا ہوں میں گُتھی
کوئی تو رشتہ بچا ہو گا درمیاں باقی
میں خاک چھان رہا ہوں یہ جاننے کے لیے
کہاں کہاں میں لُٹا ہوں، کہاں کہاں باقی
قدیم لہجے میں لکھتا ہوں اس لیے میں سراج
کہ جِدتوں میں بھی رہ جائے یہ زباں باقی
عفیف سراج
No comments:
Post a Comment