تری آنکھوں سے تیرے درد کو ہم جان لیتے ہیں

 تری آنکھوں سے تیرے درد کو ہم جان لیتے ہیں

چھپانا لاکھ تُو چاہے مگر پہچان لیتے ہیں

محبت کا صلہ ہم تو محبت سے ہی دیتے ہیں

ہم اپنے سر کسی کا بھی نہیں احسان لیتے ہیں

مِرے حالات نے رُخ ایسا بدلا ہے کہ مت پوچھو

جو پہلے جان دیتے تھے وہی اب جان لیتے ہیں

ذرا سی بھی شکایت ہم نہیں کرتے جفاؤں کی

چلائیں تیر وہ جب جب تو سینہ تان لیتے ہیں

نجانے ہو گیا ہے کیا مسلمانوں کو رب جانے

ذرا سی بات ہوتی ہے اُٹھا قرآن لیتے ہیں

پرانی رنجشیں ساری بھلا کر ہم چلو شرجی

نئی دنیا بساتے ہیں، نئے پیمان لیتے ہیں

شرجیل اعزاز شرجی