کیا غم جو فلک سے کوئی اترا نہ سر خاک
جز خاک نہیں کوئی یہاں چارہ گر خاک
ملتی ہے شرابوں کی جگہ گرد بیاباں
میخانے کو جاتے ہیں تو کھلتا ہے در خاک
صحرا کو گلستان بڑے شوق سے کہہ لو
یعنی شجر خاک سے توڑو ثمر خاک
درمان محبت ہے نشان کف پا بھی
آنکھوں سے لگا کر کبھی دیکھو اثر خاک
لالچ کی نظر کون کسی شخص کو دیکھے
آنکھوں کے ورے خاک ہے آنکھوں کے پرے خاک
ہے کون جو پھولوں کی تمنا نہیں رکھتا
اک سید دیوانہ کہ دامن میں بھرے خاک
مظفر علی سید
No comments:
Post a Comment