یہ نیا سال کسی اور ہی سمت لے کے جائے گا ہمیں

 یہ نیا سال

کسی اور ہی سمت

لے کے جائے گا ہمیں

یہ نیا دور

کسی شخص کا بننا بھی نہیں

اس نئے دور میں

محرومِ تمنا بھی ہیں جو

وہ بہ اندازِ دگر

سانس تو لے سکتے ہیں

لیکن ایسے جینے کی تعبیر بھیانک ہے بہت

ایک آسیب کا سایہ ہے

کہ ہے جس کی پکڑ سخت بہت 

ناروا لمس

اپنے نوکیلے جنوں خیز سے ناخن سے

رگِ جاں کو ہے زخمی کرتا

اس نئے سال میں مرنے کی ہے قیمت بھاری

اس نئے دور میں جینا بھی، اذیت ہے بہت

اس نئے سال میں ہر اک فرد مہاجر ہو گا

اپنے حالات پہ شکوہ کناں

اس کی قسمت میں( فقط)

ہجرِ مسلسل ہو گا

نارسائی کا تسلسل ہو گا

اس نئے سال کا ہر موسم

اک نئے رنج کا عنواں ہو گا

اس نئے سال کے ہر لمحہ کو

کیا برا ہے کہ ہم ہجرِ مسلسل کہہ دیں

ایسا پھر پُھوٹ کے روئیں

کہ نئی تاریخ رقم کر دیں

اس نئے سال میں جینے کی بھی قیمت ہو گی

اس نئے سال میں مرنے پہ بھی پابندی ہے

لیکن ایک امید کا ننھا سا دیا

ہم کو جلانا ہو گا

جانے والوں کو بھی

پھر لوٹ کے آنا ہو گا

ان مصائب کے مہیب سے سناٹوں میں

ایک ہلکی سی خوشی ایک تسلی کی کرن

سارے آلام پہ بھاری ہو گی

طاہرہ الطاف