ملو مجھ سے زمیں کی موت واقع ہو رہی ہے

 ملو مجھ سے

زمیں کی موت واقع ہو رہی ہے اور میں اب تک

اسی سرحد پہ بیٹھا ہوں 

جہاں تم نے بٹھایا تھا

مِری آنکھوں کی چھاگل میں کوئی آنسو نہیں باقی

مجھے رونے کی حسرت ہو رہی ہے 

رو نہیں پاتا

تسلی، خوف میں بدلے تو میرا ڈر مجھے ڈسنے کو آتا ہے

ملو مجھ سے

کہ میں نے زندگی بھر تم سے ملنے کے سوا چاہا نہیں کچھ بھی

مِرے ادھڑے ہوئے سینے کو دیکھو اور پہچانو 

کہ یہ قصرِ محبت اس طرح برباد ہی کب تھا

تمہیں ہجرت پہ لکھی ساری نظموں کی خبر ہے نا 

تو پھر یہ بھی پتا ہو گا

کہ ہجرت پر کوئی بھی نظم لکھنے سے خلا پورا نہیں ہوتا

ملو مجھ سے 

کہ میں ہجرت پہ لکھی نظم جیسا ہوں 

جہاں مصرعوں کے باہر تک معانی کا خلا پھیلا ہوا ہے 

بھر نہیں پاتا 

اک ایسا شخص جو مجھ میں

تمہارا نام لے کر مر رہا ہے 

مر نہیں پاتا 

ملو مجھ سے

مجھے اس شخص کو اس نظم سے مُکتی دلانی ہے

علی زریون