یوں جھکاتے ہی تِرے در پہ جبیں کانپتی ہے
جیسے بھونچال میں کچھ پل کو زمیں کانپتی ہے
جب بھی ڈرتا ہوں مِرا جھوٹ نہ پکڑا جائے
ہائے، کم بخت! یہ آواز وہیں کانپتی ہے
اس نے دیکھا ہے معلم کی جو آنکھوں میں شرر
چھپ کے بیٹھی ہے وہ مکتب میں کہیں، کانپتی ہے
دیکھنے میں تمہیں لگتا ہے وہ ادنیٰ، لیکن
خاک بھی زیرِ کفِ خاک نشیں کانپتی ہے
ہم وہ کرتے ہیں خطائیں کہ زمیں کانپ اٹھے
پردہ رکھتی ہے ہمارا جو نہیں کانپتی ہے
وہ کھڑی رہتی ہے جس پر ہو گماں گرنے کا
جس بھی دیوار پہ کرتا ہوں یقیں، کانپتی ہے
ہر گزرتے ہوئے لمحے یہ گھڑی کی سوئی
مطمئن پا کے ہمیں اپنے تئیں کانپتی ہے
جاوید جدون
No comments:
Post a Comment