سب سے یہی کہتا ہوں کہ ہاں ہے مری جاگیر

 سب سے یہی کہتا ہوں کہ ہاں ہے مِری جاگیر

یہ شوکتِ الفاظ و بیاں ہے مری جاگیر

ڈرتا ہوں کسی موڑ پہ چھن جائے نہ مجھ سے

بچپن سے جو احساسِ زیاں ہے مری جاگیر

بجھتی ہوئی شاموں کے اثاثے ہیں مرے پاس

افسردہ چراغوں کا دھواں ہے مری جاگیر

میں تیری اجازت سے یہ ثابت بھی کروں گا

اے دوست! ترا جسمِ جواں ہے مری جاگیر

سمجھاتے ہی گزری ہے دلِ نفع طلب کو

لاحاصلئ عمرِ رواں ہے مری جاگیر

میں اپنے تصرّف میں اسے کیوں نہیں لاتا

لگتا ہے کہ یہ کون و مکاں ہے مری جاگیر

پہلے مری سوچوں کا عجب رنگ تھا یاور

اب نذرِ ستم ہائے خزاں ہے مری جاگیر

یاور عظیم